நீங்கள் தேடியது "திருமண மோசடி"

கரூர்:

திருப்பூர் மாவட்டம் பல்லடத்தை சேர்ந்தவர் பாலாஜி (வயது 31). பில்லி, சூனியம் உள்ளிட்ட செயல்களை செய்து வந்த மந்திரவாதியான இவர் கரூர் மாவட்டம் சின்ன தாராபுரம் தும்பிவாடி பகுதியில் சிறியதாக கோவில் ஒன்றை கட்டி பூஜைகள் நடத்தி வந்தார். இந்த கோவிலுக்கு பொதுமக்கள் பலர் சென்று, பாலாஜியிடம் குறி கேட்டு வந்தனர். பக்தர்களின் பிரச்சனைகள் தீர பரிகார பூஜையும் நடத்தி வந்துள்ளார்.

இந்த நிலையில் அந்த கோவிலுக்கு கரூரை சேர்ந்த பெண் என்ஜினீயர் ஒருவர் அடிக்கடி சென்று வந்தார். இதனால் அவருக்கும் பாலாஜிக்கும் பழக்கம் ஏற்பட்டது. இந்த பழக்கத்தின் மூலம் இருவரும் திருமணம் செய்து கொள்ள முடிவு செய்தனர். இதைத்தொடர்ந்து கடந்த சில நாட்களுக்கு முன்பு திருமணம் செய்து கொண்டனர்.

திருமணம் முடிந்த நிலையில் கரூரில் உள்ள ஒரு திருமண மண்டபத்தில் நேற்று வரவேற்பு நிகழ்ச்சி நடைபெற்றது. இதில் உறவினர்கள், நண்பர்கள் புடை சூழ வந்து வாழ்த்தினர். பாலாஜி வாழ்த்து மழையில் நனைந்து கொண்டிருந்த நிலையில் திடீரென அங்கு, திருவாரூர் மாவட்டம் ஐ.பி.கோவில் பகுதியை சேர்ந்த மகாலட்சுமி (46) என்பவர் வந்தார்.

அவர் பாலாஜியிடம் தகராறு செய்ததோடு, உடனே வரவேற்பு நிகழ்ச்சியை நிறுத்துமாறும் அங்கிருந்த உறவினர்களிடம் தெரிவித்தார். இதனால் நிகழ்ச்சியில் பங்கேற்ற அனைவரும் அதிர்ச்சியடைந்தனர். பின்னர் அவரிடம் கேட்டபோது, பாலாஜிக்கு எனது மகளுடன் ஏற்கனவே திருமணமாகி 3 வயதில் பெண் குழந்தை உள்ளது. ஆனால் திருமணத்தை மறைத்து இப்போது 2-வது திருமணம் செய்துள்ளார் என்றார். இதனால் பெண்ணின் பெற்றோர் மற்றும் வரவேற்பு நிகழ்ச்சியில் பங்கேற்ற அனைவரும் என்ன செய்வதென்று தெரியாமல் திகைத்தபடி நின்றனர்.

இதனிடையே மகாலட்சுமி கரூர் அனைத்து மகளிர் போலீஸ் நிலையத்தில் புகார் செய்தார். புகாரில், பாலாஜி அடிக்கடி சுடுகாட்டுக்கு சென்று மாந்திரீக பூஜைகள் மற்றும் பரிகாரங்கள் செய்து வந்தார். இதனால் அவருக்கும் எனது மகளுக்கும் கருத்து வேறுபாடு ஏற்பட்டது.

எனது மகள் பல முறை எச்சரித்தும் பாலாஜி மாந்திரீக பூஜையில் ஈடுபடுவதை கைவிடவில்லை. இதனால் அவள் பிரிந்து எங்களுடன் வந்து விட்டாள். இந்த சந்தர்ப்பத்தை பயன்படுத்தி, எனது மகளுக்கு தெரியாமல் முதல் திருமணத்தை மறைத்து சட்ட விரோதமாக 2-வது திருமணம் செய்துள்ளார். எனவே அவர் மீது நடவடிக்கை எடுக்க வேண்டும் என்று கூறியிருந்தார்.

இந்த புகார் அடிப்படையில் கரூர் டவுன் போலீசார் விசாரணை நடத்தி பாலாஜியை கைது செய்தனர். தொடர்ந்து அவர் வேறு ஏதாவது பெண்ணை ஏமாற்றி திருமணம் செய்துள்ளாரா? எதற்காக மாந்திரீக பூஜையில் ஈடுபட்டார் என்று பல்வேறு கோணங்களில் போலீசார் விசாரணை நடத்தி வருகின்றனர்.

கோவை:

திருமண ஆசை காட்டி என்ஜினீயர்கள், கோடீஸ்வர இளைஞர்களை ஏமாற்றியதாக கூறப்பட்ட புகாரின் அடிப்படையில் கோவை பாப்பநாயக்கன் பாளையத்தை சேர்ந்த துணை நடிகை சுருதி.

அவரது தாயார் சித்ரா உள்பட 4 பேர் கைது செய்யப்பட்டு கோவை சிறையில் அடைக்கப்பட்டனர்.

இந்த நிலையில் நிபந்தனை ஜாமீனில் வெளியே வந்த நடிகை சுருதி இன்று நிருபர்களிடம் கூறியதாவது:-

நான் யாரையும் திருமணம் செய்வதாக ஆசை காட்டி ஏமாற்றவில்லை. அத்தனை வழக்குகளும் பொய் வழக்குகள். சைபர்கிரைம் போலீசார் என்னையும், எனது தாயாரையும் 7 நாள் காவலில் எடுத்து விசாரணை நடத்தினர். அப்போது எங்களை ஏதும் பேசவிடாமல் நாங்கள் சொல்வதை எதையும் கேட்காமல், நாங்கள் சொல்வது போல் அவர்களே எல்லாவற்றையும் எழுதி கொண்டனர்.

விசாரணையின் போது என்னை நிர்வாணமாக்கி, பெண் போலீசை வைத்து போட்டோ எடுத்து கொண்டனர். அதனை இணைய தளத்தில் வெளியிட்டு உனது வாழ்க்கையை சீரழித்து விடுவேன் என்று மிரட்டினர். மேலும் உயர் அதிகாரிகளின் ஆசைக்கு இணங்கி போனால் கொஞ்சம், கொஞ்சமாக இந்த வழக்கில் இருந்து உன்னை விடுவித்து விடுவோம் என்று மிரட்டினார்கள். மேலும் என்னை விசாரிக்க வரும் போலீசாரும் பாலியல் ரீதியாக எனக்கு துன்புறுத்தல்களை கொடுத்து வந்தனர். போலீஸ் விசாரணை முடிந்ததும் நீதிபதியிடம் இது குறித்து நான் புகார் அளித்து உள்ளேன்.

இவ்வாறு அவர் கண்ணீர் மல்க கூறினார்.

பேட்டியின்போது அவரது தாய் சித்ரா உடன் இருந்தார்.

நெல்லை:

நெல்லை மாவட்டம் கல்லிடைக்குறிச்சியை சேர்ந்தவர் முருகன் (வயது 48). இவர் நெல்லை பி.எஸ்.என்.எல். அலுவலகத்தில் அதிகாரியாக பணிபுரிந்து வருகிறார். இவருக்கு திருமணம் ஆகவில்லை. இதனால் மணமகள் தேவை என்று விளம்பரம் செய்திருந்தார். இதை அறிந்த ஒரு கும்பல் முருகனிடம் செல்போன் மூலம் பேசி அழகான பெண்ணின் புகைப்படத்தை அனுப்பி, பெண்ணுக்கு பெற்றோர் இல்லை என்பதால் திருமண செலவுகளை நீங்களே பார்த்துக் கொள்ள வேண்டும் என்றும், அதற்கான பணத்தை அனுப்புங்கள் என்றும் கூறியுள்ளது.

இதனை நம்பிய முருகன், அந்த கும்பலுக்கு ரூ.27 லட்சத்து 81 ஆயிரத்து 705 கொடுத்துள்ளார். திருமணத்துக்கு தாமதம் ஆனதால் சந்தேகம் அடைந்த முருகன் இதுதொடர்பாக நெல்லை மாவட்ட போலீஸ் சூப்பிரண்டு அருண்சக்திகுமாரிடம் புகார் செய்தார். அதன்பேரில் தனிப்படை அமைத்து விசாரணை நடத்த உத்தரவிட்டார்.

முருகன் புகார் தொடர்பாக நெல்லை மாவட்ட குற்றப்பிரிவு போலீஸ் துணை சூப்பிரண்டு ஆறுமுகம், இன்ஸ்பெக்டர்கள் ரமா, அனிதா ஆரோக்கிய மேரி ஆகியோர் தலைமையிலான தனிப்படையினர் தீவிர விசாரணையில் இறங்கினர். இந்த விசாரணையில், கன்னியாகுமரி மாவட்டம் அஞ்சுகிராமம் அருகே சத்யாநகரில் வசித்து வந்த சுப்பிரமணியன், அவருடைய மனைவி லாவண்யா, கொழுந்தியாள் மாயா ஆகிய 3 பேரும் இந்த திருமண மோசடியில் ஈடுபட்டது தெரிய வந்தது. உடனே போலீசார் 3 பேரையும் கைது செய்தனர்.

இந்த கும்பல் சென்னை அடையாறு பொன்னியம்மன் கோவில் தெருவை சேர்ந்த ராஜேந்திரன், சென்னை எல்.ஐ.சி. ஊழியர் அன்பழகன், அமெரிக்காவில் வசிக்கும் தமிழரான அரசகுமரன் உள்ளிட்டோரை ஏமாற்றியதும் தெரியவந்துள்ளது. இதன்மூலம் பல கோடி ரூபாய் சுருட்டி உள்ளனர்.

தற்போது போலீசார் இவர்களிடம் இருந்து ரூ.63½ லட்சம், 69 பவுன் தங்க நகைகள், நிலம் மற்றும் சொகுசு பங்களா, செல்போன்கள், பித்தளை சிலை ஆகியவற்றை மீட்டுள்ளனர். இவற்றின் மொத்த மதிப்பு சுமார் ரூ.1½ கோடி ஆகும்.

இந்த திருமண மோசடி தம்பதி குறித்து போலீசார் நடத்திய விசாரணையில் மேலும் பல்வேறு பரபரப்பு தகவல்கள் வெளியாகி உள்ளன. அதன் விவரம் வருமாறு:-

கைதான சுப்பிரமணியன், அவருடைய மனைவி லாவண்யா, கொழுந்தியாள் மாயா ஆகிய 3 பேருக்கும் சொந்த ஊர் நாமக்கல் மாவட்டம் என். புதுக்கோட்டையை அடுத்த காளிசெட்டிபட்டி ஆகும். இவர்கள் பல பேரிடம் இதுபோல் மோசடி செய்து அதில் கிடைத்த பணத்தை கொண்டு அஞ்சுகிராமம் அருகில் சொகுசு பங்களா கட்டி வசித்து வந்துள்ளனர். இதுபோன்ற மோசடி செயல்களுக்காகவே அவர்கள் நாகர்கோவிலுக்கு குடிபெயர்ந்துள்ளது தெரிய வந்துள்ளது.

இந்த கும்பல் மணமகள் தேவை என்று விளம்பரப்படுத்தப்படும் இணையதளங்களை அடிக்கடி நோட்டமிட்டுள்ளனர். அதில் 45 வயது முதல் 50 வயதுக்குள் இருக்கும் அதிகாரிகள், வசதி படைத்தவர்களிடம் பணம் பறிக்க திட்டமிட்டனர். பின்னர் அவர்களது செல்போனில் தொடர்பு கொண்டு அவர்களது விருப்பத்தை தெரிந்து கொண்டனர். அப்போது அவர்களிடம் அழகாகவும், ஆபாசமாகவும் பேச்சு கொடுத்து ஆசையை தூண்டினர். பின்னர் வாட்ஸ்-அப், பேஸ்புக் போன்றவற்றில் பதிவிடப்பட்டு இருக்கும் அழகான குடும்ப பெண்களின் படங்களை தேர்வு செய்து வைத்து, அதில் மிகவும் அழகாக இருக்கும் பெண்களின் புகைப்படங்களை வாட்ஸ்- அப் மூலம் அந்த ஆண்களுக்கு அனுப்பி உள்ளனர்.

அதாவது செல்பி மோகத்தில் இளம்பெண்கள் தங்களது செல்போன் படங்களை வாட்ஸ்-அப், பேஸ்புக்கில் பதிவு செய்கின்றனர். அதனை சேமித்து வைத்து மோசடிக்கு பயன்படுத்தி உள்ளனர். மேலும் அதிகமாக வெளியே தெரியாத துணை நடிகைகள், டி.வி. நாடக நடிகைகள் படங்களையும் அனுப்பி உள்ளனர். இதில் சிக்குகின்றவர்களை நைசாக பேசி தங்களது வங்கி கணக்குக்கு இணையதளம் மூலம் பணத்தை அனுப்ப கூறி பெற்றுக்கொண்டது தெரியவந்தது.

தற்போது நெல்லை மாட்ட குற்றப்பிரிவு போலீசார் சுப்பிரமணியன் வங்கி கணக்குகளுக்கு பண பரிமாற்றம் செய்துள்ளவர்களின் பட்டியலை சேகரித்து உள்ளனர். இதில் அதிகமானோர் சென்னையை சேர்ந்தவர்களாகவே உள்ளனர். அவர்களிடமும் விசாரணை நடத்தி விவரங்களை சேகரிக்க உள்ளனர்.

மேலும் இந்த கும்பல் தமிழகம் முழுவதும் கைவரிசை காட்டி இருக்கலாம் என்றும் கூறப்படுகிறது. இதுதொடர்பாக பாதிக்கப்பட்டோர் போலீசாரிடம் புகார் அளிக்கலாம் என்று வேண்டுகோள் விடுக்கப்பட்டு உள்ளது.